Trebul infameishin bla NLC eriya (Kriol version of NLC's COVID-19 travel advice)

If yu garrim NLC permit, yu garra jinggabat najawei if yu wandi gu la Aboriginal Land. Ola blekbala komunidi la NLC eriya bin dalim NLC bla stabum pipul brom gaman-gaman la olabat komunidi. Pipul gin oni gaman garra permit if dei garra dum “essential service”.

Yu gin oni gaman la Aboriginal Land if:

• Yu lib la Aboriginal Land
• NT Gabmen gulum yu ‘essential weka’ en yu garram det ‘essential weka’ permit brom NLC
• Yu olredi la Aboriginal Land en yu garra pas thru Aboriginal Land bla gubek la yu kantri

Essential Weka

Ola difren job weya NT Gabmen gulum ‘essential weka’, yu gin faindim det lis la NT Gabmen websait:

https://coronavirus.nt.gov.au/...

Rait nau if yu la Darwin eriya (Darwin, Palmerston, Humpty Doo, Belyuen lagijat)

NT Gabmen nomo larrim pipul guwin en gamat brom det Darwin eriya. Yu nomo lau bla gamat brom Darwin eriya, oni if det Chief Health Officer (CHO) bin gibit yu okei. Nomo gamat brom Darwin eriya en gu la Aboriginal Land if yu nomo garram pemishin brom det Chief Health Officier

Rait nau if yu la Aboriginal Land

If yu oldei jidan en lib la Aboriginal Land, yu garra stap jeya en jidan seif la yu kantri. If yu la Aboriginal Land bat yu nomo lib jeya, wal yu garra gubek la yu kantri streidawei en go streit jeya. Nomo go dijei tharrei en nomo go bisit pipul. Yu garra bulurum wanim det Chief Health Officer tok.

Rait nau if yu nomo la Darwin eriya en nomo la Aboriginal Land

Pipul la Katherrain, Tenin Krik en eni atha eriya la NT atsaid brom det Darwin eriya, yumob nomo lafta jidan wanpleis la kemp. Bat yu nomo lau bla go la Aboriginal Land – oni if yu ‘essential weka’ o bla yu houm im la Aboriginal Land. Mela wandim yumob bla trai jidan wan pleis.

If yu wandi gedim NLC Permit

• If yu wandi trebul la Aboriginal Land, yu garra kol o gu la det NLC Ofis gulijap la yu. Tok la det NLC Ofis bifo yu wandi trebul. Nomo gu jeya la NLC Ofis dei yu wandi trebul. Yu garra gibit olabat taim.
• If yu wandi permit yu lafta tok bla bulurum ola rul bla jidan seif brom Koronabairis en bilimat wanbala ‘travel declaration’ peipa
• NLC garra luk la ola permit eplikeishin en tok la TO-mob bifo dei gibit enibodi permit

Bla nyuwan infameishin en bla faindim ensa bla eni kwesjin yu garram bla det Darwin Eriya lokdaun en la weya dei bin faindim Koronabairis, go la: https://coronavirus.nt.gov.au

* Translated by Meigim Kriol Strongbala / Yugul Mangi Development Aboriginal Corporation