Trebul infameishin bla NLC eriya (Kriol version of NLC's COVID-19 travel advice - updated version)

Dumaji Korounabairis / Covid-19 bin gamat iya la NT, NLC bin tok nobodi kaan yusum NLC permit raitap 1pm Fraidei Julai 9, 2021 na.

Yu gin oni gaman la Aboriginal Land if:

• Yu lib la Aboriginal Land
• NT Gabmen gulum yu ‘essential weka’ en yu garram det ‘essential weka’ permit brom NLC
• Yu olredi la Aboriginal Land en yu garra pas thru Aboriginal Land bla gubek la yu kantri

Mela wandi yu bla jinggabat brabliwei if im rait bla yu bla go la Aboriginal Land. Ola blekbala komunidi la NLC eriya bin dalim NLC bla stabum pipul brom gaman-gaman la olabat komunidi. Pipul gin oni gaman garram permit if dei garra dum “essential service”.

Essential Weka

Ola difren job weya NT Gabmen gulum ‘essential weka’, yu gin faindim det lis la NT Gabmen websait:

https://coronavirus.nt.gov.au/...

Yu bin jeya la lokdaun eriya o eniweya dei bin faindim Koronabairis?

If yu gaman la Aboriginal Land bat enitaim tu wiks pas yu bin la lokdaun o eniweya dei bin faindim Koronabairis,wal yu garra lafta bulurum wanim det NT Chief Health Officer (CHO) bin tok en du ebrijing bla kipum pipum seif brom Koronabairis. Werrimon mask, jandap longwei brom pipul en woshim yu bingga olataim.

Yu la Aboriginal Land rait nau?

If yu oldei jidan en lib la Aboriginal Land, yu garra stap jeya en jidan seif la yu kantri. If yu la Aboriginal Land bat yu nomo lib jeya, wal yu garra gubek la yu kantri streidawei en go streit jeya.

If yu nomo bin bi la lokdaun eriya

If yu gin oni go la Aboriginal Land if yu lib jeya o yu ‘essential weka’ en garram det raitiwan permit brom NLC. If yu nomo lafta trebul la Aboriginal Land, jidan en weit bastam.

If yu wandi gedim NLC Permit

• If yu wandi trebul la Aboriginal Land, yu garra kol o go la det NLC ofis gulijap la yu. Nomo go jeya la NLC ofis det seim dei yu wandi trebul. Tok la olabat tu deis bifo yu wandi trebul.
• If yu wandi permit yu lafta agri bla bulurum ola rul bla jidan seif brom Koronabairis en bilimat wanbala ‘travel declaration’ peipa
• NLC gin stil tok ‘no’ en nomo gibit yu permit. NLC garra luk la ola permit eplikeishin en tok la TO-mob bifo dei gibit enibodi permit

Bla luk ola nyuwan infameishin bla Koronobairis iya la NT, go la: https://coronavirus.nt.gov.au/

Bla infameishin bla NLC, go la: www.nlc.org.au

*Translated by the Yugul Mangi Development Aboriginal Corporation